04:34:47 14°C
  • USD - 482.28 ֏
  • EUR - 568.13 ֏
  • RUB - 6.53 ֏
  • Մի տեղ պետք է լինի չէ՞ իմ որդու անունը. «Ցորի» զորամասի հրետանավորների ծնողները դիմել են դատախազություն

    19:20 11 Օգոստոս 2022

    44-օրյա պատերազմում զոհված ՝ «Ցորի»  զորամասի զինծառայողների ծնողները դեմել են դատախազությանը՝ պահանջելով քրեական գործ հարուցել Պաշտպանության նախարարության դեմ: Այս մասին այսօր՝ օգոստոսի 11-ին, լրագրողների հետ հանդիպմանն ասաց Ջիվան Միքայելյանը, որի որդին՝ Արտակ Միքայելյանը, «Ցորի» զորամասի 21 հրետանավորներից էր, որը զոհվել է 44-օրյա պատերազմում: Նրա խոսքով՝ քրեական գործ հարուցելու հիմնական պատճառն այն է, որ իրենք զանգահարել են նախարարության թեժ գիծ, և թեժ գծից նրանց հայտնել են, որ իրենք տեղեկություն չունեն, թե որտեղ են գտնվում զինծառայողները։ Ավելին, ըստ Միքայելյանի, ՊՆ–ից իրենց վստահեցրել են, որ անհանգստանալու կարիք չկա: 

    «Հոկտեմբերի 12-ից հետո մի քանի անգամ կապ եմ հաստատել թեժ գծի հետ, իրենք ինձ ասում էին, որ ձեր տղայի մասին ոչ մի տեղեկություն չկա: Ասում էին, որ ոչ մի ցուցակում չկա տղայի անունը: Բոլորին նույն պատասխանն էին տալիս: Այսինքն ես երեխա չեմ ունեցե՞լ, մի տեղ պետք է լինի չէ՞ իմ որդու անունը: Իրենք իրավիճակին չէին տիրապետում, կամ էլ մեզ էին խաբում»,- ասաց նա:

    Նշենք, որ «Ցորի» Դ-20 դիվիզոնի զոհված 21 զինծառայողներից 19-ի աճյունները հայտնաբերվել և հողին են հանձնվել պատերազմից ավելի քան մեկ տարի անց, իսկ 2 զինծառայող անհետ կորած են։ Զինծառայողների մահվան դեպքի առթիվ կա հարուցված քրեական գործ, որի անջատված մասը դատաքննության փուլում է։ Գործով մեղադրյալի կարգավիճակում է նրանց հրամանատար Գեւորգ Գեւորգյանը, որը կալանավորված է։ Նա մեղադրվում է անձնական շահագրգռվածությունից ելնելով` սեփական կյանքը փրկելու նպատակով դրսեւորել է իշխանության անգործություն, որն առաջացրել է ծանր հետեւանքներ։ Նա իրեն առաջադրված մեղադրանքը չի ընդունում։

    Հիշեցնենք, որ Արցախի պաշտպանության բանակի նախկին հրամանատար, գեներալ-լեյտենանտ Ջալալ Հարությունյանն այս գործով ևս հարցաքննվել է։ Զոհվածների հարազատները պահանջում են, որպեսզի այս գործով մեղադրանք առաջադրվի նաև Հարությունյանին։ Ըստ նրանց՝ նրա սխալ հրամանի պատճառով են իրենց որդիները զոհվել։

    ԿԱՅՔԻ ՀԻՆ ՏԱՐԲԵՐԱԿ

    Լրահոս